Гожӧм пом

Со и помасьӧ бара гожӧм. Дас куим во сайын моз жӧ. Лыддя со тайӧ кывбурӧс да ас вылӧ шензя. Кыдзи ставыс вежсьӧма! Сэки куран да зорӧд вӧрзьӧдлісны на сьӧлӧмӧс, а ӧні — вывті нин ылынӧсь.

* * *

Гожӧмыс тімбыльтчис ӧдйӧ,
Тыртӧммис, лӧнис ю дор.
Кыаыс пӧртмасьӧ-ӧзйӧ,
Гудӧклӧн шыыс зэв нор.

Шойччӧны коса да куран,
Уджавсис ассьыныс пай.
Мӧд воӧдз наӧн ог дурӧй,
Виччысям зэр да сьӧд няйт.

Зымвидзӧ пелькиник зорӧд,
Сарайным турунӧн тыр.
Гудӧклӧн шензьӧдан горыс
Пель водзын кылас на дыр.

Бара синва бандзиб кузя тюрӧ...

Бара синва бандзиб кузя тюрӧ,
Шудлунсьыс ли гажтӧмсьыс – ог тӧд.
Кольӧм кадъяс воисны тай юрӧ,
Быттьӧ сэки ачым вӧлі мӧд.

Мортыд ӧд тай лунысь лунӧ вежсьӧ,
Пӧрысьмӧны чужӧм, кок да ки.
Но, а сьӧлӧм ӧтмоза пыр пессьӧ,
Кольӧма на сэні ломзьысь би.

Сійӧ тшӧктӧ вӧчны мыйкӧ бурӧс,
Мый ме важӧн кӧсйи, а эг вӧч.
Ог на тӧд ме олӧмыслысь сюрӧс,
Сы вӧсна и пола, быттьӧ кӧч.

Но ӧд эм на вынӧй уна, уна...
Да и кадыс абу на и сёр.
Олӧмыс пыр водзӧ шлывгӧ-мунӧ,
А ме орччӧн... кывза сылысь гор.

(2005 вося кӧч тӧлысь)

Олӧм — пос

Быдсяма падмӧдыс вермас сюрны тэнад олан туй вылын, но мортыдлы быть мунны водзӧ, ӧтарӧ вуджны енмӧн сетӧм пос кузяыс олӧм пыр... Татшӧм кывкӧртӧдӧ вои 2003-ӧд воын. Август жӧ вӧлі тайӧ кывбурсӧ гижигӧн...

* * *

Менам олӧм – тайӧ джуджыд пос,
Кысянь оз ков уськӧдчыны улӧ.
Вуджны кӧ нин понді – бӧр ог кос,
Кӧть и ытва дырйи ваыс тулӧ.

Олӧм – пос, но сійӧ оз на чег,
Сӧмын на ӧд кавшаси ме сэтчӧ.
Лэчыд тӧв кӧ пӧльыштас – ог лэб,
Некор швучкысь кӧдзыдлы ог сетчы.

Небыд сьӧлӧм

Дас ӧти во сайын, нёльӧд курс... Йӧз пӧвстын дыркодь нин бергала. Небыд сьӧлӧмтӧ кокни дойдны... Медводдза ӧбидаяс... Со и воис верстьӧ олӧм...

Небыд сьӧлӧмтӧ нормӧдны кокньыд,
Ӧти кывйыс и тырмылӧ со.
Синмыд вазяс и гӧрддзасяс горшыд,
Паныд кыв шуны выныд оз ло.

Ӧтнад колян да пӧттӧдзыд бӧрдан,
Оз кут гажӧдны олӧмлӧн мич.
Эськӧ вӧлі кӧ сьӧлӧмыд кӧртӧн,
Ӧти кыв вӧсна тадзи эз вись.

Косӧд синватӧ, лэптышт вай юртӧ,
Таысь морттуйыд ньӧти оз чин.
Кӧть и гӧлӧсыд мытшъялӧ, дзуртӧ,
Эн лысьт воштыны ассьыд бур ним.

Кыдз пу корӧсь

Университетын велӧдчигӧн, кыдзи и унджык студентыс, зэв тшӧкыда вӧлі гортӧ кайлывла. Карад олігӧн мудзан гора шумсьыс, машинаяссьыс, уна йӧзсьыс. И сьӧлӧмыд кыскӧ чужан сиктад, гортад, кӧні виччысьӧ медмуса мортыд — мамыд.
Туй бӧрын пыра гортӧ, дзигӧдла мамукӧс, чой-вокӧс, чӧсмася яя шыдӧн, пӧжалӧм няньӧн юа тшай да пӧттӧдз сёрнитам. А сэсся лэчча бать пывсянӧ, мед вунӧдны став мудзсӧ. А кутшӧм чӧскыда узьсьӧ корӧсьӧн пывсьӧм бӧрад! Став сьӧкыдлуныс быттьӧ кольӧ бӧрӧ. Буретш та йылысь 4 курсын велӧдчигӧн менам чужис «Кыдз пу корӧсь» кывбур. (2005 во, кӧч тӧлысь).

* * *

Сиктсаыдлы, карад дыртӧ олігӧн,
Дышӧдлӧ дзик ставыс, мудзӧ лов.
Унаысь на муса гортӧ волывла,
Чӧскыдджык на тані нянь да сов.

Кыдз пу корӧсь киняулӧ топӧда,
Горъя пачас ёнджыка тэ кой!
Гӧгӧрбок ме ёна-ёна шлопӧда,
Ӧзйылас мед жарсьыс мудзӧм сой.

Корӧсьыд и пытшкӧстӧ тшӧтш небзьӧдас,
Пывсьӧм бӧрад мортыд дас пӧв том.
Карад, быгъя ванна пиад резсигад,
Кыдз пу корӧсьыдлы он тӧд дон!

Бара карӧ

Чужан сиктысь карӧ лэччи кызь арӧсаӧн, водзӧ велӧдчыны кад локтіс да. А мый вӧлі сэки сьӧлӧмын — воссьӧма тайӧ кывбурӧн.

БАРА КАРӦ

Вылын шондіыс ворсӧдчӧ яра,

Менсьым пальӧдӧ асъя кыз ун.

Со и бара нин мунны мен карӧ,

Ӧдйӧ воис тай колльӧдчан лун.

Туйвыв нопторйӧс киясӧ босьта,

Муна, ньӧжйӧник восьлалігтыр.

Ылі карыслы сьӧлӧмӧс восьта,

Чужан сиктӧс ог аддзывлы дыр.

Бӧрӧ кольӧны видзьяс да вӧръяс,

Менӧ колльӧдӧ небыд войтӧв.

Энӧ гажтӧмчӧй ті, сьӧлӧмшӧръяс,

Муса гортӧ ме воа на бӧр!

Шуд

Том коми нылыс велӧдчӧ карын. Мый сылы колӧ, медым кывны асьсӧ шудаӧн? Дзик этша: муса зон, бур ёртъяс, чужан сиктын тэнӧ виччысьысь мам. Сэсся нинӧм оз и ков! Тадзи менам мӧвпавсис 2003 вося юльын каникуласигӧн. 

ШУД

Кӧні менам шудӧй,

Сиктын али карын,

Кор ме сійӧс аддза,

Тӧлын али арын?

Мӧвпалі ме тадзи,

Дыркодь жуглі юрӧс.

Шудтӧ ӧд ме аддзи

Мичаӧс да бурӧс.

Карын менам шудӧй,

Ёртъясӧй кор дінын.

Орччӧн муса зонмӧй,

Сьӧлӧм аслас инын.

Сиктын менам шудӧй,

Кар бӧрын кор вола.

Мамукӧс кӧ аддза

Медся шуда лола.

Сідзкӧ, позьӧ шуны,

Шудӧй аскӧд ветлӧ.

Лов вылад кор кокни

Долыд нюмыд петлӧ!

Республикалӧн тшупӧда пас

    Талун миян Коми Республикалӧн тшупӧда пас! Ме чолӧмала сійӧс тайӧ тӧдчана луннас и сиа сылы водзӧ дзоридзавны да сӧвмыны! Мед став мытшӧдыс да майшӧгыс мунасны бокиті! 

  
                                                                                                                                                                           Помтӧм-дортӧм муяснас,

                                                       Лыдтӧм-тшӧттӧм пуяснас
                                                       Озыр миян парманым

                                                       Войвыв Коми му!...


Ме нюмъялӧмӧн лэчча площадь вылӧ.

И талун менам нимкодясьӧ лов.

А код нӧ сэні «Катшасинсӧ» сьылӧ?

И коді мыччӧ йӧзлы нянь да сов?

Республикалы ӧкмысдас вит арӧс,

Республикалӧн талун чужан лун.

И шондіыс на дзирдалӧ зэв яра,

Мед тайӧ гажа праздникыс эз вун.

А йӧзыс гӧгӧр вӧччӧмаӧсь,  шаньӧсь,

И челядь чирзӧм кылӧ сэн и тан.
Тшӧтш комиясыд, этшаӧн кӧть, танӧсь,

Да ливкйӧдлӧны гажа шондібан.

… А сё во сайын мӧдджык вӧлі олӧм

И коми йӧзлӧн зумыд вӧлі чин.

А ӧні ставлӧн морӧсаныс полӧм.

И куньса быттьӧ комияслӧн син.

Став озырлунным «дядьӧ» зептӧ пырӧ…

И татчӧ локтысьыслӧн содӧ лыд.

А коми йӧзыс лунысь-лунӧ бырӧ…

И тадз мӧй сэсся лоӧ олӧмбыд?

Вай ӧтувтчамӧй, муса коми войтыр!

И суйӧрсайлы петкӧдламӧй пуж!

Мед быдмас миян коми челядь котыр,

И коми нывлӧн роч пи мед оз чуж!

И ӧтуввезйын коми сёрни восьтам

И сӧвмӧдамӧй водзӧ коми блог.

Ми тайӧ могсӧ ас кианым босьтам,
Мед некор эз тӧд коми мортыс шог.

О, муса ёртъяс, ставыс миян сайын!

Эн  некор полӧй шуны коми кыв!

И асланым ног горӧдамӧ вайӧ 

Ас чужан мулы кыпыд сьыланкыв!

Батьлы

Дас вит арӧсӧн ме коли батьтӧг...

Сьӧкыд вӧлі сувтны кок йылӧ, эз тырмы сылӧн туйдӧм-велӧдӧмыс. Но ме пыр кылі сылысь отсӧгсӧ вылісянь и менам содлісны вынъясӧй. А вӧтъясын сійӧ пыр вӧлі ловъя и ме радлі, мый папукӧй кӧ локтіс бӧр — ставыс лоас бур. 

2003 вося юльын карсянь чужанінӧ волігӧн чужи менам дона мортлы сиӧм кывбурыс...

* * *

Батьлы

Кыдзи быдми да кутшӧмӧн лои,
Сӧмын та йылысь батьӧй оз тӧд.
А ӧд кутшӧма сійӧ мем колӧ,
Сытӧг олӧмыс лои дзик мӧд.

Батя-нылаӧс торйӧдӧ енэж,
И кӧть кыдзи оз морӧсӧс йир.
Век жӧ омӧльсӧ кыдзикӧ вена,
Кӧть и дзуртӧ нин ӧдзӧслӧн дзир.

Кылан, папукӧй, тэныд ме эска,
И ме кыла, мый орччӧн тэ пыр.
Мед жӧ овлӧ мем сьӧкыд и дзескыд,
Водзӧ олӧмӧн думъясӧй тыр.

Важ тетрадьяс

Книга джадж пелькӧдігӧн вель дыр кежлӧ ылавлі важ тетрадьясӧ. Ставсӧ вунӧдлі, мый менӧ кытшалӧ, да дзик рытӧдзыс зуняси-гижи важӧн нин заводитлӧм кывбуръяс. А сэсся юрӧ воис мӧвп: водзӧ сӧвмӧдны ассьым коми блог. Аскисянь кута пуктыны ӧти кывбурӧн лун. Небӧг кор на и лэдзасны, а мед кӧть лыддьысьысьяс тӧдмаласны, мый менӧ майшӧдліс и майшӧдлӧ.