2016-05-05

Чужанінын

Тувсов зэрыс торкис асъя унмӧс.
Сьӧлӧм пессьӧ, некыдзи оз ин.
Регыд воас выль да гажа луныс,
Регыд садьмас менам чужанін.




Костӧдышта гусьӧн дзоля ӧшинь,
Кывзысьышта, кыдзи шувгӧ сад.
Зэрыс ӧддзӧ, киссьӧ быттьӧ кӧшысь.
Вежӧр корсьӧ ичӧтдырся кад…

           ...Со ме локта ыджыд мамӧ дорӧ...
           Иган увті пыра, юа йӧв.
           Пренник-кампет ас дорас и корӧ...
           Таысь бурджык кадыс эз и вӧв.

           Кыптӧ тӧлыс, дуриг увъяс летӧ,
           Льӧм пу дорысь вайӧ чӧскыд кӧр.
           Сьӧлӧм ловзьӧ, долыд нюмӧй петӧ...
           Лэбны эськӧ челядь кадӧ бӧр!



(ода-кора 5-ӧд лун, 2016 во)  

2015-03-29

КРИЗИС

Локтіс тулыс, сылӧ лым.

Регыд кутас кывны гым.
Сьӧлӧм вылын бара лёк:
Йӧзлӧн киссьӧ оланног.
Магазинын кыптӧ дон...
Путин, кылан али он?
Дзик кӧ дзугсяс олан визьыс,
Коді мыжа лоас? Кризис?

Мед лёк олӧмысь не повны,
Колӧ йӧзлы ладӧн овны.
Кодыр  бырас зык да вен,
Гашкӧ-й видзас сэки Ен.

2014-11-14

Вошӧм кывбур

Кӧн тэ шӧйтан, менам кывбур,

Быттьӧ шӧйӧвошӧм ыж?
Тетрадь листӧй век на тыртӧм,
Йирӧм карандашӧй ныж.

Корся тэнӧ тӧлысь, мӧдӧс...
Кадыс лэбзьӧ...коли во...
Олӧм мунӧ...чукыр лӧдӧ...
А ме гижысьӧн эг ло!

Гашкӧ, мӧдлысь восьтін ӧдзӧс?
Сійӧ меысь ӧмӧй бур?
Лок да менсьым вынӧс ӧддзӧд!
Лок да югдӧд менсьым юр!

Тэнӧ лелькуйтны ме кута,
Мӧдысь пышйыны ог сет!
Гашкӧ, тэкӧд йӧзӧ пета,
Гашкӧ, лоа на поэт!