Велӧдысьяслӧн лунӧн!

 Ме чолӧмала  мирсьыс став велӧдысьсӧ праздникӧн да сиа налы ыджыд терпенньӧ да дзоньвидзалун!



Торйӧн казьтыштла ассьым медводдза велӧдысьӧс Вера Евлогиевнаӧс. Сідз жӧ Скӧрӧдумса мукӧд велӧдысьсӧ, класснӧй руководитель Нина Витальевнаӧс, Помӧсдін школаысь велӧдысьясӧс. 

    Оз петны вежӧрысь и университетын велӧдысьяс: Федина Марина Серафимовна, Чуяшкова Мира Валерьяновна, Игушев Евгений Александрович, Остапова Елена Васильевна, Пунегова Галина Васильевна, Лудыкова Валентина Матвеевна, Попова Римма Павловна.  Ті сетінныд миянлы уна тӧдӧмлун, медым быдтыны коми кыв велӧдысьясӧс. 

И кӧть ме ог уджав школаын, век жӧ ме велӧдысь! Нылӧй мӧд во мунас первой классӧ, да код тӧдас, гашкӧ, ме курсъяс прӧйдита да тоже муна велӧдны. А мый, коми велӧдысьясыд век колӧны. Ӧні тӧдсалӧн нывкаыс мӧдӧд классын велӧдчӧ да пыр ме дорӧ шыӧдчӧны коми кыв урок  кузяыс. Ме окотапырысь отсала налы. Дерт, сьӧкыд школаад уджавныд, но коми кыв радейтӧмыс ёнджык. Лыддьӧй бӧръя во универын велӧдчигӧн гижлӧм кывбур.


Бӧръя во

Быттьӧ ӧні на гортысь ми петім,

Медым югдӧдны ассьыным юр.

Ӧта-мӧднымлы чорыд кыв сетім:

Петас миянысь велӧдысь бур.

Унатор сійӧ кадсяньыс вежсис.

Факультет ӧні новлӧ мӧд ним.

Деканатным мӧд местаӧ лэбзис,

Да и деканлӧн мӧдджык нин чин.

Кадыс исковтіс, эг весиг тӧдлӧй.

Бӧрӧ кольӧма став сьӧкыдлун.

Сӧмын узьӧмсьыс ог вӧлі пӧтлӧй.

Студент олӧмыс некор оз вун.

Уна небӧг ми ки пырным лэдзлім,

Уна гижлім конспект и доклад.

Зачёт-экзамен дырйи пыр педзлім,

Тайӧ сессия-медся пӧсь кад.

Со дипломлӧн нин бӧждорыс матын,

Да и синъясным миян нин дон.

Енмӧй, отсав ю паныдсӧ катны,

Енмӧй, сет босьтны «ловъя» диплом!


                                                                         2006-ӧд во

(Коми велӧдысьяс, 2007-ӧд вося выпуск)