Ӧнія кадся мужичӧй

  Коді сійӧ ӧнія кадся мужичӧйыс? Ме чайта да ӧнія кадся мужичӧйтӧ колӧ торйӧдны сиктса да карса вылӧ.

     Карсаыс, гашкӧ, лакированнӧй ёсь ныра туплиа, стрелкаа сьӧд гача, еджыд дӧрӧма, пинджака да галстука? Киас дипломат. Сы дорысь ӧвтӧ дона пирменнӧй одеколонӧн. Ветлӧдлӧ иномаркаӧн сы кодь жӧ мода серти пасьтасьӧм анькӧд…

     Или гашкӧ кодалысь мужичӧй йылысь гижны? Ӧні сэтшӧмыд тырмымӧн. Сиктад и карад ӧткодя позьӧ юны. Та йылысь гижӧм вылӧ ме ог кут кадсӧ лойны… 

...Тадзи ме думайті пошта разӧдігӧн. Юрӧ кутісны воны быдсяма мӧвпъясыс. Ручкаыд эськӧ дінын эм, а вот кабалаыд абу. Колӧ  блокнот новлӧдлыны, мед мӧвпъясӧй юрысь эз чеччыштны да эз вошны. А блокноттӧ кӧ босьта-юрӧ навернӧ нинӧм оз во, сідз нин менам велавсьӧма да. Сэсся друг син улӧ усис бумагатор: «Муж на час». Сэтшӧм бумагаыс ӧшинь воръяс вель уна вӧлі да ме ӧтикӧс босьті.

Телепон нумерсӧ на сетӧма и. Сэсся нюмӧй петіс: а гашкӧ, тайӧ и лоӧ ӧнія кадся мужичӧйнас да? Колӧ звӧнитлыны да юавлыны мыйджык сэтчӧ пырӧ часнас вӧзйӧм услугаас. Ӧні ӧд унаӧн ас вылас уджалӧны: зэвтӧм йиркъяс вӧчалӧны, пластикысь ӧшинь пукталӧны, патера дзоньталӧны. Унджыкыслӧн кредит да ипотека да колӧ ӧд вештыны мыйӧнкӧ, а нӧшта на семьясӧ вердны-пасьтӧдны.

   Важӧнтӧ ёна кыйсьылӧмаӧсь, тайӧн кынӧмпӧт перйылӧмаӧсь. Вӧрыс вӧлӧма вердысьӧн. Дерт жӧ, сэкся кадся мужичӧйыс-вӧралысь. Со и ӧнія кадся мужичӧй йылысь гижигӧн меным окота пасйыштны буретш вӧралӧм. Тайӧ мужичӧйлӧн медтӧдчана торъялӧм аньяс дорысь, кӧть эськӧ важӧнтӧ и нывбабаяс сідз жӧ вӧравлісны.

      Кыйсьӧм йылысь сёрнитігӧн дум вылӧ воӧ Ваньӧ вок . Сійӧ олӧ Скӧрӧдум сиктын. Уна во вӧр пӧрӧдіс, а ӧні детсадйын стӧрӧжалӧ. Зэв ёна радейтӧ кыйсьыны. Быд ар воча вокыскӧд кайӧны вӧр керкаӧ. Кыйсьыны радейтӧмыс вуджис, дерт жӧ, батьӧсянь. Вӧрас налӧн ас вӧчӧм керка и пывсян на нӧшта эм. Лунтыр вӧралӧм-собалӧм бӧрад пывсяныд зэв на и лӧсялӧ. Керкаыскӧд орччӧн ю визувтӧ. Сэтысь вок радейтӧ кыйны чери.

Вок ме моз жӧ радейтӧ занимайтчыны спортӧн (абу бокӧ рӧдйӧма). Водзынджык нин веранда вылын сійӧ весигтӧ спортзал вӧлі вӧчӧма. Сы дорӧ волывлісны и мукӧд зонъяс. А вӧрын уджалігад некутшӧм спорт оз нин ков и сідз мудзан, но век жӧ мукӧддырйи лэптавлӧ жӧ кӧрт ёкмыльтӧ. Ӧд та бӧрын кылан асьтӧ ёнӧн да удалӧн. Спортасьӧмыс сідз жӧ лӧсялӧ мужичӧйяслы, но ӧнія кадӧ содӧ лыдыс и мускулъястӧ радейтысь нывбабаяслӧн.

     Ӧнія кадся карын олысь мужичӧй вермас лоны сідз жӧ учёнӧйӧн, либӧ кыв да фольклор туялысьӧн, либӧ журналистӧн. Вежӧрыд тшӧтш жӧ зэв вылӧ донъявсьӧ ӧнія кадӧ. 



Но тайӧ сылы оз мешайт  шойччан лунӧ ветлыны вӧрӧ кыйсьыны либӧ лэччывны ю дорӧ черила да радейтны спорт.

     ...Но ӧд и сиктса мужичӧй вермас пасьтавлыны пинджак да ёсь ныра тупли, петас кӧ кытчӧкӧ йӧз водзӧ. 

Главнӧйыс, мед мортыс вӧлі сьӧлӧма, тӧждысис семья вӧснаыс, радейтіс гӧтырсӧ да челядьсӧ.

     Но йӧз пӧвстын содӧ ӧткалун. Гӧтыра кӧть котыра, но оз гӧгӧрвоны йӧзыс мӧда-мӧднысӧ... И тайӧ тадзи артмис сы вӧсна, мый мирын ласьт кутысьяс тӧдӧмӧн кӧвъялӧны мортыслы эгоист сяма мӧвпаланногсӧ, медым йӧзыслӧн воши позянлун ӧтувтчыны да ӧтвылысь вермасьны ӧтувъя интересъяс вӧсна. Кор быд морт торйӧн да нӧшта и мӧд йӧзыскӧд векся пиньын-зыкын — зэв кокни ставнысӧ кипод улын кутны.

     Гашкӧ, сы вӧсна найӧ и эновтӧны ассьыныс челядьсӧ и корсьӧны мӧд аньӧс, кодлӧн сідз жӧ эм челядь. И найӧ быдтӧны йӧзлысь кагасӧ. Гашкӧ, колӧ аньяслы лоны небыдджыкӧн, кывны ассьыд пӧвтӧ, лоны сылы ёртӧн и олан гажӧн, медым эз ло тадзисӧ. Медым челядьӧс сӧвмӧдіс-велӧдіс век жӧ рӧднӧй батьыс.

А эмӧсь и сэтшӧм мужичӧйяс, кодъяс нэм кежлӧ кольӧны ӧтнасӧн, вужвыйӧныс сетчӧны уджлы либӧ радейтанатор вӧчӧмлы...

     Унаӧн сідз жӧ бӧрйӧны ӧтуввезйын йитӧд: скайп пыр сёрнитны, смс-каасьны. И татшӧм йитӧдыс вежӧ збыльнӧйсӧ. Дерт, ӧти ногӧн, ӧтуввезйын сайтъяс колӧны. Мукӧдыс аддзӧны тані ассьыныс пӧвсӧ, но кодсюрӧыс кольӧны семьянысӧ.

 Паськалӧма ӧні и ӧти пола йитӧдъяс. 



Кутшӧм эськӧ нимкодь видзӧдны кӧляскаӧн гуляйтысь мужичӧй вылӧ, кодӧс гортас виччысьӧ ань! Но олӧмыс висьталӧ мӧдтор...