Аттьӧ тяпилы

 Мича мыгӧр йылысь ме 9-ӧд  классянь нин мечтайта.

 Гортын вӧлі рӧмпӧштан водзын гусьӧникӧн «ножич» вӧчала, кынӧмса яйчиг (пресс) ёнмӧда, кияс зумыдмӧдӧм могысь  гира лэптала. Воклысь  гирасӧ босьтлі.

     Школаын  физкультуратӧ ог ёна радейт вӧлі. Университетын велӧдчигӧн шейпинг вылӧ ветлӧдлі. И пыр вӧлі аслым шуа: «Талун ог на, а выльлунсянь дзик нин кута занимайтчыны». Но воліс выльлун и менам бара на сюрліс мӧд удж и ме бара на виччыси мӧд вежонсӧ, медым заводитны. Кӧть эськӧ 15 минутыд сюрис жӧ нин да…

     А куим во сайын босьтчи пӧртны олӧмӧ ассьым кӧсйӧмӧс, понді ветлӧдлыны тренируйтчан жырйӧ. 
 Войдӧр ӧтнамӧн вӧлі лы-сьӧмӧс песа, некод оз кӧсйы да. Нывъёрт весиг шуліс :«Олін-олін да сэсся пӧрысьӧ-немӧ кутін гираяс лэптавны!». А ме эг кывзы сійӧс, ӧд кӧсйӧмӧй вӧлі ёнджык. 
Детсадйын уджалігӧн вӧлі медводз топыда сёя, сэсся муна СГУ профилакторийӧ ёнмӧдчыны. Ставӧн шойччӧны, а ме "пӧсьӧдча". А сэсся локта да юа йӧв кӧвдумӧн. Но кыдзи нӧ детсадйын бӧрыньтчыны сёйӧмысь? Сідзи эз и збыльмы кӧсйӧмӧй кытісюрӧ яйсьӧдыштны, а кытісюрӧ вӧсньӧдыштны.

 Бӧръя восӧ нывъёрткӧд заводитім ёнмӧдчыны. Сылы окота лои тшӧтш мекӧд "уджалыштны" аслас мыгӧр вылын. Тырмас пӧ дышӧдчыны да гос чукӧртны. 

Со и талун  мунім. Вежан кӧлуйӧс босьті (футболка да гач), а вот кедіӧй и вунӧма. Ковмис удж вылысь тяпиӧс кватитны, ог ӧд бӧр гортӧ ветлы. Тяпинад, вӧлӧмкӧ, дзик оз лӧсяв спортасьныд. Неуна котралыштӧм бӧрын заводиті лажмӧдчыны штангаӧн (приседанньӧ вӧчны). Менам тайӧ медмуса упражненньӧӧй. Но сӧмын на копыртчи — шатовтӧдіс менӧ! Чуть эг усь ныр вылӧ! Тайӧ вӧлӧм менӧ тяпиыд шатлӧдлӧ. Кыськӧ котӧрӧн воис велӧдысь (тренер). Некор на некод эз матыстчывлы миян дорӧ. Велӧдысьясыдлы ӧд сьӧм колӧ вештыны отсасьӧмсьыс. Сы вӧсна ми пыр асьным вӧлі кужтӧгыс ёнмӧдчам. Та вӧсна и бӧртасыс (результатыс) абу. А талун вот ёна и мудзи! Медшӧр могыс пӧ колана ногӧн вӧчӧм, а абу сьӧкта.



 Приседанньӧтӧ пӧ вӧчигӧн мышкутӧ колӧ  веськыда кутны и пуксьыны, пидзӧсыд мед кок чуньсьыд ылӧджык эз пет. 









А коді сӧмын на заводитӧ ёртасьны штангаяскӧд, налы оз позь сьӧкыдсянь заводитны. Бурджык медводз гираӧн татшӧм упражненньӧ вӧчны, код отсӧгӧн тшӧтш ёнмӧны кокъясыд. Сідз жӧ мышкуыд веськыд и надзӧникӧн пуксьыны-лажмӧдчыны.









Нӧшта "выпады" упражненньӧ (восьлалӧмӧн лажмӧдчӧм) колана ног велӧдіс вӧчны: мышкутӧ кутан веськыда, ӧти пидзӧстӧ лэптан ныр дорӧдзыд, сэсся друг лэдзан и воськовтан, лажмӧдчан. 






А "планка" упражненньӧ бурмӧдӧ став вир-сӧн юкӧнсӧ. 




Нӧшта петкӧдліс, кыдзи мат вылын бурджыка "нюжмасьны" (растяжка вӧчны). Тайӧ зэв ёна лӧсялӧ ёнмӧдчӧм бӧрын.



Час чӧж миянӧс  лешсьытӧдз велӧдіс тайӧ кужысь мортыс.   Ёнмӧдчан жырсьыс петі шуй кодьӧн. Аттьӧ тяпилы! Эг кӧ шатовтчы — эз бы и матыстчы велӧдысьыд, эг бы и гӧгӧрволы, мый неногӧн ёнмӧдча.