Кор ме аслым сеті тайӧ юалӧмсӧ, син водзӧ пыр жӧ сувтіс батьӧ. Сійӧ вӧлі шуӧ, Таня пӧ (менам чой) лоӧ сьылысьӧн, мича гӧлӧсыс да, а Наташа (ме) — велӧдысьӧн, терпенньӧа да. Но ачыс водз быри, да эз збыльмы сылӧн кывйыс. Чойӧс вӧлі корӧ нывъёртыс культпросветӧ велӧдчыны, но эз ло мунӧмыс. А ме эськӧ 5 во чӧж велӧдчи учителяд, но збыль велӧдысьнас эг жӧ и ло.
Ӧні ӧд челядьыдлӧн компьютер — став олӧмыс, а ми вӧлі ичӧт дырйи зэв ёна письмӧасям. «Йӧлӧга» да «Би кинь» пыр корсям аслыным нывъёртъясӧс и гижалам ӧта-мӧдлы письмӧяс. Ёртасьны кӧсйысьыс вӧлі уна, и ми вӧлі ним сертисӧ бӧрйысям. Сэки вӧлі мунӧ сериал «Дикӧй Роза», да сы вылӧ видзӧдӧмӧн Вероника нима кӧ сюрас вӧлі кодкӧ, нывъёрткӧд мырддьысям вӧлі весиг. Конверт пиас тэчам жвачка вкладышъяс, наклейкаяс, открыткаяс.
Сэтшӧм окотапырысь вӧлі мунам сиктса пошта вылӧ и кыйкъялам, кор нин локтас пошта новлӧдлан машинаыс да ваяс миянлы письмӧ. Меным кажитчӧ вӧлі газетъяснас ноксьӧм вылас видзӧдныс, газетыслӧн дукыс. А ӧти лунӧ меным воис 9 письмӧ! Ме чуть гатшӧн эг усь сэки радысла!
Дерт, эг сы понда ме ло пошта новлӧдлысьӧн. Ме век чайтлі, мый лоа гижысьӧн. Сы вӧсна, кор 11 класс помалӧм бӧрын тӧдмалі, мый Сыктывкарын пӧ эм финно-угорскӧй факультет, менам чужи ыджыд кӧсйӧм велӧдчыны сэні. И кор ме прӧйдитлі университет дорті, пыр вежгӧмпырысь видзӧдлі еджыд рӧма ыджыд керка вылас да мӧвпавлі сэні велӧдчӧм йылысь. Но сійӧ вонас менам эзджык суйтчы баллыс пырнысӧ. Ёна, дерт жугыльми, но эг дзикӧдз усь сьӧлӧмӧн. Мед батьсянь пенсияыс эз вош и мед гортын прӧстӧ не баллявны, муні велӧдчыны Кебанъёльӧ вурсьысьӧ. И сӧмын коймӧдысь видлӧм бӧрын менӧ босьтісны университетӧ…
А бӧръя велӧдчан во помас ме пыравлі уджавны пошта вылӧ. Сэки нин меным мусмис тайӧ «пон» уджыс (кыдзи йӧзыс шулывлӧны). Быттьӧ збыльмис кӧсйӧмӧй: нокся «чӧскыд дука» газетъясӧн да письмӧясӧн.
Майбыр, ветлӧдлан улич вывті (а пырджык котралан) и разӧдан йӧзыслы быд сикас юӧр. Быдсяма йӧзыскӧд паныдасьлан, но век жӧ бурыс да шаньыс унджык. Тайӧ уджыс зэв кывкутана. Кад вылӧ кӧ он вай письмӧтӧ либӧ газеттӧ — оз жӧ юрсиӧдыд шыльӧдны.
5 вотӧ велӧдчи да, век жӧ коліс уджавны профессия серти. Корсьыси лӧнь удж, медым пукавны шоныдінын и гижасьны. Муна вӧлі Печать керка дорті да быть юрын ӧзйылас мӧвп сэні уджалӧм йылысь. Михаил Андреевич Елькин весиг коркӧ корліс «Войвыв кодзув» редакцияӧ, но жугалӧм телепон пырыд кодь лои миян сёрни, и мӧд ног гӧгӧрвоӧма менӧ да мӧдӧс сэсся босьтіс. Ёна ме сэки скӧрмывлі сы вылӧ и дугдывлі весиг гижнысӧ (быттьӧ сылы колӧны менам гижӧдъясӧй).
Но кӧть мый, а кыскӧ жӧ литератураыд. Сьӧлӧмыд корӧ и тшӧктӧ гижны, и корсюрӧясӧ век жӧ лякӧсьтлывлі кабалаястӧ шыпасъяснад. Со тай ӧні куйлӧны джаджйын — ас гижӧдӧн «мичмӧдӧм» газет торъяс да мый да. Мый ки улӧ вӧлі сюрас, сэтчӧ и пасйышта юрӧ воӧм мӧвпъяссӧ. Да и «Войвыв кодзувтӧ» пыр ньӧбсьӧ. «Ордым» лавкаад кокӧй ачыс жӧ кежӧдӧ. Мӧдысь бара звӧнитліс Ӧньӧ Мишыд, гашкӧ, пӧ ӧні тэнӧ босьта. Ме бара радлі и кывбуръястӧ помышталі, быттьӧкӧ таысь и пуксьӧдӧны редакторӧ, но бара на эз артмы. Сідз мечтаӧн и коли «Войвыв кодзув» редакцияын уджалӧмыс.
Пыравлі уджавны и кагульничаӧн. Эг эськӧ сы вылӧ велӧдчыв, но мися йӧзыс тай кыдзкӧ видзӧны жӧ челядьӧс да, гашкӧ, артмас. Но бӧрдысь челядьӧс аддзӧм бӧрын ме уськӧдчи найӧс бурӧдны да чышкавны синвасӧ, а эг ло налы авторитетӧн. Бӧрыннас эськӧ гӧгӧрвои жӧ, кыдзи колӧ кутны асьтӧ кагульничалы, но вӧлі сёр нин.
Сьӧм бӧрся вӧтлысигӧн юрӧс сиравлі эг ӧти сетевӧй компанньӧӧ. Мися нажӧвита уна сьӧм, ньӧба керка, машина, отсала чойлы-воклы и лоа медся шудаӧн.
Кыдзи сӧмын эг зіль ачымӧс вежны, сідзи и коли абуджык сёрниаӧн да полыськодьӧн. Ньӧба выль платтьӧ да радла, мися ӧні дзик нин вежся, лоа вылын юраӧн да сюсьӧн. Но платтьӧ пасьтавлӧм бӧрын рытнас казявлі, мый ме бӧр нин сэтшӧм Наташа, кутшӧм вӧлі чужӧмсянь. Ак, жӧ мися эськӧ тайӧ чериыс да! (гороскоп серти ме чери).
Либӧ жӧ ньӧба выль луннебӧг и аслым кӧсйыся гижавны сэтчӧ быд рыт план, мый вӧчны аскинас. Но кык-куим лун сӧмын гижала, и менам выль луннебӧгӧй бара нин куйлӧ джаджйын да пасйӧдъяс пыдди бус чукӧртӧ. А сэсся нин ме бара выль компанньӧӧ нырӧс сюя, и бара колӧ выль платтьӧ да выль луннебӧг, гашкӧ, ӧні нин збыль вежся?! Кыз сьӧм кульыштны сямӧй эз и ло. Сідзи и коли пошта новлӧдлысьӧн.
