Кабачкиысь чӧскыд лечо

     Шойччан лунъясӧ кайлі чужан сиктӧ. Бӧрсӧ локтігӧн аскӧд вайи кык сумка тыр кабачки. Ыджыдсьыс ыджыдӧсь да ӧдва и кыски. 

Но ме тӧда, мый сійӧ ставыс менам инасяс.

     Кабачкисьыд зэв унатор позьӧ вӧчны: лечо, рагу, варенньӧ, икра, пызьӧн жаритны, ӧладдьӧ  пӧжавны. Менам холодильникӧй тырӧма нин быдсяма банкаяснас.

     Вӧзъя тіянлы лечолысь рецепт, кодӧс ме коймӧд во чӧж нин вӧча. Кытчӧкӧ кӧ гӧститны муна- пыр аскӧд кватита дзоляник банкатӧ.

     Миянлы колӧ босьтны:

-3 кг кабачки

-5 лук

-6 юмов болгарскӧй переч

-1 кг помидор

Маринад вылас босьтам:

- 1 литр томатнӧй сок (ме 500гр томатнӧй паста босьта и 0,5 литра дэбыд пузьӧдӧм ва)

- 1 ыджыд пань сов (абу чукйӧн)

- 3 ыджыд пань песок

- стӧкан джын 9% уксус (позьӧ и сытӧг)

- 1 стӧкан кӧнтусь вый

- кымынкӧ чеснок кусӧк

1)      Рытнас кабачкияссӧ мыськалам  (пӧрысь кабачки кӧ перъялам кышсӧ) да вундалам соломкаясӧн, киськалам 1 пань солӧн, гудралам и сюям холодильникӧ. Войбыдӧн найӧ лэдзасны сок, кодӧс ми кисьтам. Миянлы лишнӧй ваыс оз ков.

2)      Лук весалам, мыськалам и вундалам посньыдика кубикъясӧн.

3)      Переч мыськам да весалам кӧйдыссьыс,вундалам соломкаӧн.

4)      Помидор вундалам кубикъясӧн.

Кор ставыс лоӧ дась, ыджыд кастрюляӧ тэчам ставсӧ, мый колӧ маринад вылӧ. Гудралам и виччысям, кор кутас пуны.

     Тайӧ маринадас быд 10 минут мысти содталам овощи да  гудралам.

Медводз пуктам кабачки. Дас минут мысти пуктам лук. Сэсся болгарскӧй переч. Нӧшта 10 минут мысти пуктам помидор. Пуам 30-40 минут и выключитам миянлысь лечонымӧс. Помланьыс позьӧ содтыны туся переч. Пукталам пӧсь ру улын видзыштӧм банкаясӧ. Чӧскыда лечоасьны!