Сьӧлӧм бердӧ йӧршитчӧма полӧм...

Мамнад лоан да асьтӧ быттьӧ вунӧдлан. Став тӧждысьӧмыс да радейтӧмыс вуджӧ кага вылад... Сьӧлӧм вылад чужӧ майшасьӧм да полӧм: а верма-ӧ ме сетны аслам кагалы ставсӧ, мый колӧ? Видзны сійӧс став мувывса лёкторъяссьыс и петкӧдны бур туй вылӧ.
2011 воын  йирым 4-ӧд лунӧ кага ланьтӧдӧм бӧрын пукси дінас да вель дыр мӧвпалі та йылысь. Ӧні юксьышта тіянкӧд аслам сэкся кывбурӧн.

* * *

Сьӧлӧм бердӧ йӧршитчӧма полӧм,
Кутшӧм дзоля мортлӧн лоӧ олӧм.
Узьӧ-нускӧ, нинӧм на оз тӧд.
Бур, мый гачыс кос да кынӧм пӧт.

Кытшовта став вӧрсӧ, юсӧ, видзсӧ,
Чукӧрта став мирсьыс бурсӧ, мичсӧ,
Зільлун, сюсьлун, авъялун на сюрас,
Олӧм чӧжӧн кӧдза нывлы юрас.

Сьӧлӧм бердӧ йӧршитчӧма полӧм,
Кутшӧм дзоля мортлӧн лоӧ олӧм.
Мам йӧв кындзи нинӧм на оз ков,
Нюмъялыштӧ, узьӧ сӧстӧм лов.