2016-10-02

Нянь...

Талун пуи кукань яя шыд. Дышӧдӧма нин чипаныс да. Чӧвті тасьтіӧ шыдсӧ, перечалышті. Вунді нянь да мавті Помӧсдінса чӧскыд выйӧн. Пуксим сёйны Вероника нывкӧд. Сійӧ шуис, мый тайӧ сылӧн медрадейтана вый. А сэсся юаліс: «Мам, а кыдзи артмис тайӧ няньыс да выйыс?» Ме шӧйӧвоши да вочавидзи, мися выйыд йӧлысь артмӧ, а няньыд... И сэки дум вылӧ усис ыджыд мамлӧн нянь перйӧм йылысь висьталӧм…

Важ крестьянаыс няньтӧ перйылісны зэв сьӧкыда. Машинаыд некутшӧм эз вӧв: ни тӧлӧдчан, ни вартан. Ставсӧ вӧчлісны ки помысь.
Медводз мусӧ вӧлӧн гӧрасны да агсаласны. Сэсся тазйӧ пуктасны нянь кӧйдыссӧ да киӧн коялӧмӧн кӧдзасны. Лоас нянь ӧзим. Быдмас да воас нянь. Шепъяссӧ вундасны чарлаӧн. 


Сэсся чумалитасны майӧгӧн, мед тӧлалас. Ид кӧ дас кольтаӧн. Сю кӧ — ӧкмысӧн. Тӧлалӧм бӧрас чумалияссӧ ыб вывсьыс тэчасны сёрӧмӧ да лэччӧдасны гумла вылӧ. Сэсся лонтасны рыныш, да сэтчӧ няньсӧ шӧтласны, мед косьмас. Мӧд луннас вартасны чапӧн да тӧлӧдасны тӧлӧн. Сы бӧрын сӧвтасны мешӧкӧ да нуӧны гортаныс. Сэсся сійӧс паччӧр вылын косьтасны, гырйын чирсасны, шердъясны, пожналасны да нуасны мельничаӧ изны. Сэні изасны да лоӧ пызь. Ид кӧ — нӧшта на пызьыслысь кыдсӧ пожналасны. Да вӧлисти на пӧжаласны нянь.


...Видзӧда да шыд тасьтіным кушмӧма нин. Тупӧсь джынсӧ миян сёйсьӧма чӧскыд выйнад. Сёйигчӧж ме висьталі нывлы няньлысь донсӧ, мый колӧ сійӧс видзны, оз позь шыблавны.  Дерт, ыджыд мам моз ме эг сяммы, но Вероника думыштчис. А сэсся  кушӧдз сёйис няньсӧ (мукӧддырйи кольлывліс пинь туйсӧ).

Ӧні быд лавкаын няньыд тырмымӧн. Мыйта кӧсъян-сы мында и позьӧ ньӧбны. А менам ичӧтдырсяысь син водзӧ кольӧма нянь вылӧ ӧчередь сулалӧм. Урокъяс бӧрын менам сійӧ и вӧлі уджӧй. А гортӧдз воліс сӧмын тупӧсь джынйыс. Сэтшӧм чӧскыдӧн кажитчывліс пӧсь свежӧй няньыс! Мамӧ век шулывліс: "Наталляыд бара нин йирӧма".

Олӧмыс мунӧ.  Ӧні нин машинаяс вӧчӧны став уджсӧ. И быд сикас няньсӧ позьӧ пӧжавны. Вежсьӧны нянь быдтысьяс, пӧжалысьяс, сёйысьяс. Но сылӧн доныс да коланлуныс кольӧны медся вылын.

(Водзӧ лоӧ на)

Комментариев нет:

Отправить комментарий