2016-10-01

Менам ыджыд мам

Талун олӧма йӧзлӧн лун. Медся мусаыс да донаыс верстьӧяс письыс менам коли ыджыд мамӧй. Сійӧс шуӧны Жангурова Пелагея Яковлевнаӧн. Сылы кык лун мысти тырӧ 92 арӧс. Ме чолӧмала сійӧс талунъя праздникӧн да сиа бур дзоньвидзалун.

Ыджыд мам нэм чӧжыс овліс Скӧрӧдумын. Чужтіс-быдтіс ӧти нылӧс (менсьым мамӧс), нӧшта эмӧсь 3 внук-внучка и 3 правнучка. Вермигас на, быд сикас уджсӧ кужліс вӧчны. Уджтӧгыс овнысӧ вӧлі оз вермы. Весиг коркӧ больничаӧ веськавлӧма да и сэні корӧма мыйкӧ вӧчны, кузь пӧ овнысӧ да. И медсестраыс сетӧма дзоридзьяс киськавны.

Ыджыд мам сідзжӧ зэв варов морт. Весиг ӧні, кӧть и оз нин чеччывлы, век мыйкӧ висьталӧ, важсӧ казьтывлӧ. А нӧшта радейтӧ сьывны. Уна сикас коми да роч сьыланкыв тӧдӧ, и миянӧс тшӧктӧ сьывны. Со кыдзи 10 во сайын висьтавліс ыджыд мам аслас олӧм йылысь:

— Ме кӧсъя висьталыштны ассьым олӧмӧс война кадӧ. Нелямын ӧтиӧд воын война сувтіс да, батьӧс нуисны армияӧ. Мамӧ висьмис, да став уджыс вӧлі меным сюрӧ. Кукань видза вӧлі скӧтнӧй дворын. Сёйнытӧ нинӧм, кач вӧлі сёям. Мӧсным эз вайлы куканьсӧ да начким. Жаль эськӧ, но Ёгор дядь велӧдіс: «Вай мӧстӧ начкӧй, асьныд куланныд да мӧсныд кольӧ». Мӧстӧ начким. Яйсӧ петкӧдім жытникӧ. Тшыг йӧзыд заводитлӧмаӧсь пырны сэтчӧ, вевтсӧ костӧдӧмаӧсь. Но абу вермӧмаӧсь, дерт, йӧзасис. Сэсся ми яйтӧ солалім ыджыд бӧчка тыр. Войнас петкӧдім кӧбрег гуӧ. Но та пӧрйӧ шышъясыдлы мойвиӧма: миянлысь яйтӧ ставнас гусялӧмаӧсь, ни ӧти кусӧк абу кольӧма. Мамӧ висьӧ вӧлі да некыдзи лои корсьысьнысӧ. Сідзи и колим яйтӧг.

Мӧд воас, 42-ӧд воас, мамӧ кулі. Картупель пуктыны ветліс, кын печенчатӧ сёйӧмаӧсь да отравитчӧма. Сэки отравитчӧмсӧ ог на вӧлі тӧдӧй, да мамӧ войнас и куліс. Колим 4 посни челядь. Батьӧс лэдзлісны отпускӧ. Ёгорӧс да Лизаӧс сетіс Вомынбӧжса детдомӧ, а ми колим арӧстӧм кагакӧд. Ме ачым 17 арӧса вӧлі, кӧзяин и кӧзяйка пыдди коли. Быдторсӧ лои аслым вӧчны: пестӧ лӧсьӧдны вӧлӧн, картупельтӧ пуктыны, гӧрны-кӧдзны. Зэв сьӧкыд вӧлі овнысӧ. Меным колӧ быд лун удж вылӧ мунны: сэки ӧд шойччан лун ни отпуск эз вӧв. Войнас на вӧлі нӧшта ыстасны удж вылад. Рок паньтыр вылӧ лунтыр уджалам. Трудодень пасъясны, но нинӧм оз сетны. Кач сёям, турун сёям. Турунсӧ тоям гырйын да пу изкиӧн изам, сэсся кач да турун сора ляпа пӧжалам. Сэки сэсся тшак кутіс петны да тшактӧ пуам, а пиньсьыс бара ляпа пӧжалам. Пиньыс номырӧсь да ляпа вылас номырыс вӧлі веглясьӧ! Пӧжалан да номырыс тшӧтш пӧжассьӧма. Дзик тшыгӧсь да сійӧ и сёям.

Пӧчӧ ловъя на вӧлі да во-мӧд сійӧ кагасӧ видзыштіс. Сэсся сійӧ кулі да кагатӧ некытчӧ лои кольнысӧ. Яслиыд абу да, ӧтнассӧ куті кольны. Сэсся сійӧ ӧтнасӧн кутіс овны да заводитіс резьӧдчыны. Носки корсям-некытысь оз сюр. Кватитчам да тупыль! Носкисӧ резьӧдӧма да тупыльӧ быдмалӧма (гартӧма). Менсьым дӧмаса ковта резьӧдӧма да тубралӧма — дзик быттьӧ тӧвар лоӧма. Меся колӧкӧ эн резьӧдчы-а, чунь помтӧ ножичӧн вундала! Сэсся вежӧраджык буракӧ лои да дугдіс резьӧдчӧмсьыс. Оліс на 5 арӧсӧдз.

Синмӧй висьны кутіс да, сэсся петі скӧтнӧй дворсьыд, больничаын куйлі. Сэсся пыри бригадаӧ уджавны. Ёльысь 20 во чӧж ваялі турун. Сэки ёльтӧ вӧлі ставсӧ пуктӧны...



55 арӧсӧн петі пенсия вылӧ и сы бӧрын 2 во на уджалі. Сэсся Ваньӧ (внук) чужи да, эг кут эштыны и лои дугдыны. Окота на эськӧ вӧлі гожӧмнас уджалыштны да… Зэв сьӧкыда олім. Ӧні тай быдлаті жӧ висьӧ.

(Водзӧ лоӧ на)

Комментариев нет:

Отправить комментарий